Vendimi i Ministrisë së Mbrojtjes së Greqisë për të mbyllur një repart ushtarak në zonën e Filatit rreth 25 km larg kufirit me Shqipërinë ka nxitur protesta të banorëve dhe bashkisë lokale atje që prej javës së kaluar. Çështjet e vendosura në qendër të protestës lidhen me sigurinë kombëtare motivuar kjo edhe me pretendimin e disa fletushkave të gjetura sipas autoriteteve në Greqi që përmbanin kërcënime prej një organizate të quajtur Ushtria Çlirimtare e Çamërisë. Top Channel ishte sot në Filat për të verifikuar praninë e këtyre materiale të propagandës nacionaliste, siç pretendojnë banoret e Filatit, por autoritetet nuk i dispononin duke thënë se janë në zotërim të policisë dhe se ka nisur një hetim për çështjen. Policia greke nuk na lejoi te intervistonim banore dhe autoritetet lokale të zonës duke na kërkuar që të riktheheshim një herë të dytë pasi të merrej një leje e posaçme prej Ministrisë së Jashtme greke siç e kërkon ligji grek për zonat pranë-kufitare. Vendimi për shkrirjen e Batalionit 628 të Këmbësorisë në atë zonë ka shkaktuar tensione të spektrit ekonomik për banorët pasi sipas tyre do të dëmtojë të ardhurat lokale dhe punësimin çka është edhe pika e dytë e peticionit drejtuar Ministrisë së Mbrojtjes. Por pak banorë në zonën e Konispolit zona më e afërt me pikën kufitare të Qafë-Botës kishin dijeni për ngjarjen. Në Konispol, Xarrë dhe Mursi banorët po merren me punët e para të pranverës ndërsa ende dhjetëra punëtorë nga kjo zonë shkojnë çdo ditë në Greqi për të punuar në mbyllje të sezonit të vjeljes së mandarinave. Ata e komentojnë këtë zhvillim si çështje tërësisht të brendshme të Greqisë me natyrë të pastër ekonomike. Punonjësit e bashkisë së Filatit kanë pezulluar punën për dy ditë e gjithashtu edhe mësimi është ndërprerë në shenjë proteste në shkollat kryesore. Ditët në vijim pritet edhe një tubim paqësor para Ministrisë së Mbrojtjes në Athinë shoqëruar nga shoqatat e prindërve dhe kujdestarëve. Ministria e Mbrojtjes kishte deklaruar se do të mbyllen të paktën 132 prej 837 reparteve ushtarake ekzistuese. Plani përfshin fuqizimin e reparteve të mbetur duke rritur në masën 70% efektivët dhe armatimet.