Kjo është ajo se çfarë ka mbetur nga masakra në festivalin me muzikë elektronike ku u vranë më shumë se 260 të rinj nga militantët e Hamasit. Grupi i xhirimit të Top Channel, që ndodhet në Izrael, pa nga afër vendin e ngjarjes i cili tashmë i ngjan një varreze makinash. Kudo sheh automjete me xhama të thyer nga të shtënat me armë por dhe të djegura nga raketat. Ndërkohë sendet personale dhe veshjet e të rinjve janë ende në tokë. Në pamundësi për t’u larguar pjesëmarrësit vrapuan për të shpëtuar nga plumbat. Ata që mbijetuan thanë se ushtarët abuzuan fillimisht me viktimat e më pas i ekzekutuan. Organizatorët kishin ngritur në shkretëtirën Negev, afër Kibbutz Re'im, skenën e festivalit tashmë të shkatërruar, një zonë kampingu si dhe një bar. Vendi nuk ishte shumë larg rripit të Gazës, nga ku luftëtarët e Hamasit kaluan në territorin e Izraelit dhe nisën sulmin e tyre. Ata depërtuan në qytete e fshatra duke marrë peng e duke vrarë dhjetëra njerëz. Trupat e viktimave, siç shihet dhe në këto pamje të Top Channel, vijojnë të qëndrojnë brenda banesave ende.