Gjykata e Lezhës ka caktuar masën e sigurisë “arrest me burg” pa afat për dy të rinjtë e përfshirë në përplasjen me armë që ndodhi pak ditë më parë në Laç, ku mbeti i vrarë një person dhe u plagosën katër të tjerë, përfshirë edhe një shitëse ambulante. Të arrestuarit, Klevis Ndreca dhe Daniel Gjeloshi, u përballën me vendimin e gjyqtarit Lirim Buluca, i cili e cilësoi të ligjshëm ndalimin e tyre dhe urdhëroi që ata të qëndrojnë në paraburgim për veprat penale të “vrasjes” dhe “mbajtjes pa leje të armëve të zjarrit”. Ndreca ishte i pranishëm në sallën e gjyqit, ndërsa Gjeloshi u përfaqësua nga avokati mbrojtës, pasi ndodhet ende nën kujdes mjekësor për shkak të plagëve të marra në ngjarje. Kujtojmë se ngjarja u regjistrua mesditen e të shtunes në rrugen që të qon per tek kisha e lacit. Sipas hetimeve paraprake, përplasja nisi pas një incidenti rrugor mes dy automjeteve, që dyshohet të ketë qenë përplasja e pasqyrave gjatë lëvizjes. Të rinjtë ranë dakord të ndalonin për të sqaruar situatën, por sapo kanë zbritur nga makinat, konflikti ka degjeneruar në shkëmbim zjarri. Nga të shtënat e Klevis Ndrecës mbetën të plagosur tre persona, mes tyre edhe shoku i tij Amarildo Ndoj dhe një shitëse ambulante. Një tjetër person i plagosur, Gerald Bitri, ndërroi jetë më vonë në spital si pasojë e plagëve. Edhe Daniel Gjeloshi qëlloi me armë ndaj kundërshtarëve, por pa shkaktuar lëndime.