Apeli i Gjykatës Kundër Krimit të Organizuar dhe Anti-Korrupsionit ka rrëzuar sot kërkesën e ish shefit të Operacionales, Oltion Bistri. Ndërsa drejtone prej një viti strukturën më të rëndësishme të përgjimeve në Policinë e Shtetit, Bistri u akuzua se bashkëpunonte dhe informonte grupet kriminale. Zyrtari i lartë i policisë, u arrestua me urdhër të SPAK. Emri i tij u zbulua falë deshifrimit nga ana e autoriteteve të drejtësisë belge dhe hollandeze, të komunikimeve të realizuara përmes shërbimit të koduar Sky EncroChat. SPAK thotë se ka mundur të provojë se “nga hetimet e kryera dhe provat e administruara është evidentuar se që nga viti 2015 e në vijim i hetuari Oltion Bistri dhe familjarët e afërm të tij kanë kryer disa transaksione të dyshimta në lidhje me shitjen dhe blerjen e pasurive të paluajtshme”. Prandaj edhe në muajin shkurt, SPAK vendosi vënien nën sekuestro të rreth 1 milion eurove pasuri, në prona të paluajtshme, të cilat i përkisnin ish drejtorit të Forcës operacionale Oltion Bistri, i arrestuar në muajin korrik, në kuadër të hetimeve ndaj disa grupeve kriminale në vend.