Mandati i Olta Xhaçkës prodhoi përplasjen e parë të grupit parlamentar demokrat me kryetaren e re te Kuvendit Elisa Spiropali, e cila vendosi që vendimi i Gjykatës Kushtetuese për deputeten socialiste të shqyrtohet në Këshillin e Legjislacionit në fund të gushtit dhe jo në një seancë të jashtëzakonshme siç kishte kërkuar opozita një ditë me parë. Citat Elisa Spiropali: Urdhëroj mbledhjen e Këshillit të Legjislacionit në datën 27.08.2024 ora 11:00 me rend dite, shqyrtimi i vendimit të Gjykatës Kushtetuese nr.55 datë 10.07.2024. Vendimi për të mos i prishur pushimet socialisteve duke mos mbledhur Parlamentin në një seancë të jashtëzakonshme nuk u prit mirë nga opozita. Kryetari i grupit demokrat e cilësoi urdhrin e kryeparlamentares si antikushtetues. Citat Gazment Bardhi: Kryetarja e Kuvendit ka detyrimin kushtetues dhe ligjor të thërrasë sesionin e jashtëzakonshëm të Kuvendit brenda 3 ditëve nga paraqitja e kërkesës së 1/5 së deputetëve, për të zbatuar pa vonesa vendimin e Gjykatës Kushtetuese. Mbledhje e Këshillit të Legjislacionit, përveçse zvarritje e panevojshme e procedurës për heqjen e mandatit të Olta Xhaçkës, është konsideruar edhe një procedurë antikushtetuese nga Gjykata Kushtetuese. Kryetarja e Kuvendit e kishte gati përgjigjen ndaj Gazment Bardhit duke ja bërë te qarte se nuk do të thërrasë një seancë të jashtëzakonshme plenare pa pasur më parë një raport të Këshillit të Legjislacionit për çështjen Xhaçka. Citat Elisa Spiropali: Kërkesa e paraqitur nga 1/5 e deputeteve për thirrje të Kuvendit në sesion të jashtëzakonshëm, në kushtet e mungesës së një akti të Këshillit për Legjislacionin, e bën të pamundur zbatimin e nenit 74, pika 3, të Kushtetutës. Gjithashtu, ju informoj se shqyrtimi në seancë do të bëhet menjëherë me fillimin e sesionit të ri parlamentar, pasi të jetë përcjellë raporti i Këshillit për Legjislacionin. Me apo pa seancë të jashtëzakonshme mandati i Olta Xhaçkës parashikohet të hapë debatin në sesionin e ri parlamentar qe nis në shtator.