Ndryshimet e Rregullores së Kuvendit nuk e kaluan plotësisht filtrin kushtetues. Pas shqyrtimit të ankimimit të grupit parlamentar demokrat gjykata arriti në konkluzionin se mënyra e zbatimit të disa masave ndëshkuese ndaj deputetëve që prishin seancat plenare ishte antikushtetuese. Trupa e gjyqtarëve vendosi që dënimi për 30 ditë të aplikohet vetëm në rastin kur deputeti dëmton pajisjet apo orenditë e sallës, por jo ne rastin kur ligjvënësi përdor dhunë ndaj kolegeve të tjerë, anëtarëve të qeverisë apo gardës për shkak se një gjë e tillë është e parashikuar tek masa ndëshkuese e përjashtimit 10 ditor nga punimet e kuvendit. Masa disiplinore prej 60 ditësh jepet vetëm në rastet e përdorimit të tymueseve, mjeteve piroteknike, bojërave apo mjeteve të ngjashme duke shfuqizuar dy pikat e tjera të rregullores me argumentin që ishin shume evazive. Deputetët që marrin masë disiplinore nuk u lejohet kalimi i pragut te Parlamentit, por gjykata kushtetuese është e mendimit që ligjvënësit nuk mund t’i ndalohet hyrja në ambientet e kryesisë apo sallës së seancave plenare nga garda e republikës duke e shfuqizuar këtë ndalesë. Socialistët rritën pa dakordësi ndëshkimet ndaj deputetëve ne dhjetor te 2023, pas aksionit te mosbindjes civile te demokrateve te drejtuar nga Sali Berisha, te cilët për gati 5 muaj pamundësuan zhvillimin normal te punimeve te kuvendit.