Me këtë thirrje të drejtpërdrejtë, Sali Berisha nuk e fshehu alarmin nga Ervin Salianji, i cili nuk i mungoi as foltores së Mirditës. Kryedemokrati u mor sërish me lëvizjen e re të nisur nga deputeti Salianji, ndërsa foli për betejë vendimtare të Partisë Demokratike. As në bashkinë e djathtë të Mirditës, foltorja e Sali Berishës nuk shkoi siç pritej, pasi bashkëbisedimin e dominuan kritikat e mbështetësve. Nën frikën e lëvizjes së re të Salianjit, që po bën bashkë më të votuarit e primareve dhe zgjedhjeve të 11 majit, Sali Berisha po nxiton të nisë më në fund analizën e brendshme. Ndërsa vetë udhëtoi drejt Mirditës për foltoren e radhës, në bazën e Partisë Demokratike në Tiranë u publikua një udhëzues i posaçëm për nisjen e analizës së brendshme pas zgjedhjeve të fundit parlamentare. Në udhëzimin e firmosur nga Sekretari i Përgjithshëm, Flamur Noka, analiza kërkohet të kryhet me ritëm të shpejtë dhe në mënyrë shteruese nga të gjitha organet e Partisë Demokratike, në të gjithë vendin.