Ndërhyrjet në rrugë për shkak të punimeve për ujësjellësin dhe kanalizimet kanë sjellë kufizime në qarkullimin rrugor pranë rrethrrotullimit të Urës së Dajlanit në Durrës. Punimet do të vijojnë deri më 15 tetor. Për këtë arsye, njëri krah i rrugës do të bllokohet përkohësisht, ndërsa automjetet do të devijohen në krahun tjetër, ku qarkullimi do të organizohet në të dyja drejtimet. E njëjta skemë do të zbatohet edhe në krahun tjetër të segmentit, për të mundësuar përfundimin e shtrimit të tubacionit. Ndërhyrjet janë pjesë e një investimi të Shoqërisë Rajonale Ujësjellës Kanalizime Durrës, me vlerë rreth 26,5 milionë lekë, që synon lidhjen e godinave të projektit “Durrës Marina” me rrjetin e furnizimit me ujë të pijshëm dhe atë të kanalizimeve të ujërave të zeza. Afati i përgjithshëm i investimit është tre muaj, ndërsa punimet në segmentin rrugor, që kalon nga territori ku po ndërtohet Durrës Marina drejt Urës së Dajlanit, parashikohet të zgjasin katër ditë.