Top Channel/ Kryeministri britanik në SHBA. Sunak do takohet me Biden për rrezikun e teknologjisë

Kryeministri britanik Rishi Sunak ndodhet në Uashington. Ai do të takohet me Presidentin Joe Biden të enjten në Shtëpinë e Bardhë ku pritet të diskutojnë për disa tema, mes të cilave ajo e Inteligjencës Artificiale por dhe luftës në Ukrainë. Rishi Sunak gjatë këtij takimi do të lobojë që dhe Britania të marrë një rol dominues në rregullimin e inteligjencës artificiale, pas paralajmërimeve të ekspertëve për rreziqet ekzistenciale të teknologjisë. Sipas mediave të huaja, Sunak dëshiron që në Londër të vendoset një ekip rregullator që të kontrollojë rreziqet që mund të shkaktohen nga Inteligjenca artificiale. Kërkesë kjo që kryeministri britanik do e paraqesë dhe gjatë takimit të G7 që do të zhvillohet në ditët në vijim. Por krahas rreziqeve të teknologjisë, Sunak do të flasë me Biden dhe për luftë në Ukrainë. Dy liderët pritet që të rrisin akoma më shumë mbështetjen ndaj forcave ushtarake ukrainase pas hedhjes në erë të digës së hidrocentralit në Kakhovka. Para se të nisje drejt SHBA, Sunak e cilësoi sulmin ndaj digës si të qëllimshëm dhe më të madhin ndaj infrastrukturës civile deri më tani. Pamjet: AFP