Zjarrfikësit në Turqi vazhdojnë përpjekjet për të shuar zjarret që kanë përfshirë kodrat me pyje në perëndim të vendit të premten. Zjarret që shpërthyen në të paktën pesë vende të ndryshme në provincën bregdetare të Egjeut kanë shkaktuar vdekjen e dy personave, shpërnguljen e dhjetëra mijëra banorëve dhe dëmtimin e rreth 200 shtëpive. Zjarret janë shkaktuar nga temperaturat e larta, erërat e forta dhe lagështia e ulët. Ministri i Pyjeve të Turqisë, Ibrahim Yumakli, tha të premten se zjarrfikësit, të mbështetur nga avionë zjarrfikës, janë ende në terren duke luftuar me një zjarr vdekjeprurës pranë qytetit Odemis për ditën e tretë me radhë. Ndërkohë, ekipet e emergjencave po punojnë për të parandaluar përhapjen e një zjarri të ri që shpërtheu të enjten vonë pranë rrethit të Bucës. Zjarri pranë Odemisit mori dy jetë njerëzish, një punonjës pyjor që vdiq të enjten gjatë përpjekjeve për të shuar flakët, dhe një banor 81-vjeçar që humbi jetën për shkak të thithjes së tymit, sipas autoriteteve. Një tjetër zjarr që shpërtheu të mërkurën pranë destinacionit turistik të njohur në Çesme u vu nën kontroll të premten, tha Yumakli. Zjarri nxiti evakuim në tri lagje dhe shkaktoi mbyllje të përkohshme të rrugëve. Zyrtarët turq nuk kanë dhënë ende ndonjë vlerësim të sipërfaqes së përgjithshme të tokës së djegur nga zjarret. Edhe në greqinë fqinje, situata nuk është aspak më e lehtë. Gjendja e emergjencës është shpallur në Kretë pasi ishulli popullor grek është gjunjëzuar nga zjarre të rrezikshme. Mbi 5 mijë pushues të tmerruar janë larguar nga ishulli 24 orët e kaluara ndërsa një ferr flakësh vazhdon të shkrumbojë rajone të shumta.