Kriza e emigrantëve e detyroi Papa Françesku-n të bëjë një vizitë në Marsejë, ku për dy ditë me radhë do të diskutojë për Mesdheun dhe sfidat me bumin e refugjatëve të paligjshëm. Ai mbërriti në qytetin e vjetër të Francës me një mesazh tolerance mes debateve të vazhdueshme mbi mënyrën se si Evropa po menaxhon situatën e azilkërkuesve. 86-vjeçari u prit në aeroport nga kryeministrja franceze Elisabeth Borne, e më pas vijuan me axhendën. Fillimisht Papa lëvizi i ulur në karrocë për shkak të problemeve shëndetësore, por më pas u ngrit në shenjë respekti për bandën ushtarake që e priste. Marseja u zbukurua me ngjyrat e verdha dhe të bardha të Vatikanit për vizitën e parë të një pape në qytetin e dytë më të madh të Francës, ku pritet që të zhvillojë një fjalim përpara 100 mijë personave. 86-vjeçari po viziton për të marrë pjesë në një takim të peshkopëve dhe të rinjve katolikë të zonës mesdhetare, por udhëtimi i tij vjen në një kohë të ndjeshme politikisht. Marseja është një portë historike për emigrantët dhe gjithashtu shtëpia e disa prej lagjeve më të varfra në Evropë, shumë prej të cilave janë të rrënuara nga trafiku i drogës. Pamjet: AFP