Dhoma e Përfaqësuesve në SHBA ka votuar për të anuluar tarifat e Presidentit Donald Trump ndaj mallrave kanadeze. Me një votim 219 kundër dhe 211 pro tarifave, gjashtë ligjvënës republikanë iu bashkuan demokratëve për të mbështetur një rezolutë që kërkon t'i japë fund tarifave që Trump i vendosi Kanadasë vitin e kaluar. Vota është kryesisht simbolike pasi duhet të miratohet nga Senati i SHBA-së dhe më pas edhe nga Trumpi, i cili ka shumë pak gjasa ta nënshkruajë atë për ta kthyer në ligj. Që nga rizgjedhja e tij, Donald Trump ka vendosur një sërë tarifash ndaj Kanadasë, duke kërcënuar së fundmi edhe me një taksë 100% të importit në përgjigje të marrëveshjes tregtare të propozuar të Kanadasë me Kinën. Ndërsa votimi po zhvillohej në Dhomën e Përfaqësuesve, Trump shkroi në Truth Social: "Çdo republikan, në Dhomë ose në Senat, që voton kundër tarifave do të vuajë seriozisht pasojat në kohën e zgjedhjeve. Tarifat na kanë dhënë Siguri Ekonomike dhe Kombëtare, dhe asnjë republikan nuk duhet të jetë përgjegjës për shkatërrimin e këtij privilegji," shtoi ai. Votimi erdhi pasi Kryetari i Dhomës së Përfaqësuesve Mike Johnson, një aleat i Trumpit në Kongres, u përpoq pa sukses të bllokonte diskutimin në sallën e parlamentit nga ligjvënësit mbi tarifat e Trumpit. Meqenëse republikanët mbajnë një shumicë të vogël në Dhomën e Përfaqësuesve, dezertimi i gjashtë republikanëve, që shihen në një front pothuajse të bashkuar me demokratët, ishte i mjaftueshëm për të siguruar votat. Masa u propozua nga një kongresmen demokrat sipas të cilit Trump i ka "përdorur tarifat si armë" kundër aleatëve dhe ka destabilizuar ekonominë globale.