Stuhia Nils do të sjellë reshje të dendura dëbore në Alpet e Francës, duke gjeneruar një rrezik të lartë orteqesh, veçanërisht në Savojë, ku ata mund të kërcënojnë rrugët dhe madje edhe shtëpitë, tha Météo-France. Meteorologët e kanë vendosur Savojën në alarm të kuq për "orteqe" për të enjten, duke përmendur një "situatë të jashtëzakonshme", sipas buletinit të mbrëmjes. Alarmi i kuq është në fuqi nga ora 6:00 e mëngjesit deri në 10:00 të mbrëmjes të enjten dhe kërkon "vigjilencë të shtuar, veçanërisht rreth disa fshatrave ku janë mbyllur edhe resortet e njohura të skive. Disa resorte kanë njoftuar mbyllje të plotë të zonave të tyre të skive dhe disa të tjerë, mbyllje të pjesshme. Planet e ndërhyrjes për shkak të orteqeve "do të vihen në zbatim sipas nevojës nga bashkitë dhe menaxherët për të siguruar rrjetin rrugor, si dhe nga shërbimet e pistave të skive për të garantuar sigurinë e zonave të skive", tha prefektura e Savojës. Në Val d'Isère, disa rrugë mund të mbyllen dhe udhëzime sigurie mund të lëshohen për ndërtesat. Ortekët "mund të arrijnë rrugët dhe infrastrukturën malore, madje edhe shtëpitë, përgjithësisht mbi 1,800 m lartësi. Por për shkak të shtresës së dëborës veçanërisht të paqëndrueshme në vend, disa ortekë të mëdhenj janë të frikshëm dhe mund të arrijnë deri në fundet e luginave", paralajmëruan ekspertët. Paralajmërimi vjen ndërsa sezoni i skive është në kulmin e tij në vendpushimet alpine, ku autoritetet po i paralajmërojnë vazhdimisht skiatorët për rreziqet e skijimit jashtë pistës kur kushtet e motit favorizojnë ortekët. Më shumë se njëzet skiatorë ose alpinistë kanë humbur jetën deri më tani, këtë vit, nga ortekët në vargmale të ndryshme të Alpeve në Austri, Itali, Francë dhe Zvicër.