Rikthehen skenat e dhunës mes nxënësve të shkollave. Një sherr i rëndë ndodhi mesditën e së hënës mes nxënësve të gjimnazit “Sami Frashëri” në Tiranë, ndërsa përplasja ka ndodhur në afërsi të këtij institucioni arsimor. Përpos grushteve dhe shkelmave, të rinjtë kanë përdorur edhe sende të forta, duke marr edhe konet e parkimit për të gjuajtur një të ri në grup. Nga pamjet e siguruara nga Top Channel, shihen që ngjarja ka ndodhur në prani të të rriturve, por nuk ka pasur asnjë ndërhyrje nga këta të fundit për të shuar sherrin. Nga pamjet shihet se janë shumë të rinj të pranishëm, por 6 gjimnazistë duket se kryejnë veprime aktive duke sulmuar një djalë, i cili i vetëm mbrohet me duar ndaj grushteve dhe goditjeve me sendet e forta. Top Channel pyeti policinë e shtetit e cila konfirmoi se për ngjarjen janë evidentuar të gjithë personat e përfshirë në sherr dhe se oficerja e sigurisë si dhe oficerët e Komisariatit nr.3 kanë ndërhyrë duke punuar ende për sqarimin e rrethanave dhe shkaqet e konfliktit.