Grupi militant palestinez Hamas thotë se Fateh Sherif Abu el-Amin, udhëheqësi i grupit në Liban, është vrarë së bashku me disa anëtarë të familjes në një sulm ajror izraelit në Libanin jugor. Hamasi raporton se ai u vra në një sulm “në shtëpinë e tij në kampin Al-Bas në Libanin jugor”. Agjencia Kombëtare Libaneze e Lajmeve, e drejtuar nga shteti, raportoi për një sulm ajror në kampin pranë qytetit jugor të Tirit. Edhe pse Hamasi është i vendosur në Gaza, ku Izraeli e ka luftuar atë që nga sulmet e 7 tetorit, ai gjithashtu ka një prani në Liban. Ndërkohë, Hezbollahu dhe Izraeli kanë këmbyer zjarr përgjatë kufirit paralelisht me luftën e Izraelit në Gaza kundër Hamasit. Hezbollahu thotë se po e lufton Izraelin në mbështetje të Hamasit, i cili e kreu një sulm në jug të Izraelit tetorin e kaluar duke e nxitur luftën në Gazë. Më shumë se 1.670 njerëz, përfshirë 104 fëmijë, janë vrarë nga sulmet izraelite në Liban prej 8 tetorit të vitit të kaluar, sipas Ministrisë së Shëndetësisë së Libanit.