U arrestuan në Gjermani dy të rinj shqiptarë të shpallur në kërkim nga SPAK. Konkretisht në pranga janë vënë Fabio Ballabani, alias Fabio Zyberaj dhe Erland Krasniqi. Policia sqaron se në Fabio Ballabani, alias Fabio Zyberaj, 37 vjeç, i lindur në Vlorë, ishte shpallur në kërkim ndërkombëtar pasi Gjykata e Posaçme Kundër Korrupsionit dhe Krimit të Organizuar Tiranë, kishte vendosur masën e sigurisë “Arrest në burg,” për veprat penale “Goditje ndaj pjesëtarëve të familjes së personit që kryen një detyrë shtetërore,” e kryer në bashkëpunim në formën e grupit të strukturuar kriminal dhe “Kryerja e veprave penale nga Grupi i strukturuar kriminal dhe Organizata kriminale.” Fabio Ballabani, alias Fabio Zyberaj, në vitin 2019, shtriu në tokë një shtetas duke i vendosur pistoletën në gojë dhe e kërcënoi për ta vrarë për shkak të detyrës së bashkëshortes së tij. Bëhet fjalë për bashkëshortin e një gjyqtareje të GJKKO, e cila ishte pjesë e trupit gjykues në një gjyq që zhvillohej kundër një grupi të krimit të organizuar. Nga hetimet dhe këqyrja e kamerave të sigurisë, u identifikua si autor i sulmit shtetasi Fabio Ballabani. Erland Krasniqi, 25 vjeç, i lindur në Kavajë, ishte shpallur në kërkim ndërkombëtar pasi Gjykata e Juridiksionit të Përgjithshëm Durrës, në maj 2024, ka caktuar masën e sigurimit personal “Arrest me burg,” për veprën penale “Plagosje e rëndë me dashje” dhe “Prodhimi pa leje i armëve luftarake dhe municionit.” Erland Krasniqi, pas një konflikti për motive të dobëta, plagosi me armë zjarri shtetasin Renato Bajraktari. Interpol Tirana po bashkëpunon me autoritetet gjermane për ekstradimin e këtyre dy shtetasve drejt vendit tonë.