Spak lajmëroi dje në mbledhje se Ergys Agasi, i shpallur në kërkim prej dhjetorit të vitit 2025, është arrestuar këtë të mërkurë në hyrjen jugore të Durrësit. Sipas SPAK-ut, arrestimi u krye në zonën e Plepave, pas disa javësh kërkime dhe bashkëpunimi mes strukturave të specializuara të Policisë së Shtetit dhe Byrosë Kombëtare të Hetimit. Në momentin e arrestimit, Agasi shoqërohej nga shtetasi U. Sh., ish-punonjës policie. Ky i fundit u arrestua në flagrancë për veprën penale “Përkrahja e autorit të krimit”. Ergys Agasi është person nën hetim në kuadër të procedimit penal nr. 20/1 të vitit 2025. SPAK e heton atë për një sërë veprash penale, mes të cilave konkurrencë të paligjshme nëpërmjet dhunës, heqje të paligjshme të lirisë, shkelje të barazisë në tendera, korrupsion aktiv, pastrim parash dhe pjesëmarrje në grup të strukturuar kriminal. Gjykata e Posaçme kishte caktuar ndaj tij masën e sigurisë “arrest në burg” më 15 dhjetor 2025, ndërsa vendimi i ishte dërguar Policisë së Shtetit për ekzekutim dy ditë më vonë. SPAK bëri të ditur se hetimet për këtë procedim penal vijojnë, ndërsa falënderoi Policinë e Shtetit për realizimin me sukses të operacionit. Ergys Agasi dhe personat e tjerë nën hetim konsiderohen të pafajshëm derisa fajësia e tyre të vërtetohet me vendim gjyqësor të formës së prerë.