Top Channel ka zbardhur disa nga bisedat e dosjes voluminoze të SPAK për grupin kriminal të Suel Çelës, i cili çoi në arrestimin e 18 personave, dy gazetarëve në detyrim paraqitje dhe të një avokateje në arrest shtëpie. Nga përgjimet e zbardhura, Suel Çela ndërhyn për të bërë të mundur emërimin e gjyqtares Pajtime Fetahu në krye të Gjykatës së Elbasanit. Madje, Suel Çela i ofron një makinë 40 mijë euro gjyqtares Enkeleda Kapedani, (e njohur si gjyqtarja e Tiktokut), e shkarkuar nga Vetingu, në këmbim të tërheqjes së saj nga gara për kryetare të gjykatës, me qëllim që kryetare të zgjidhej Pajtime Fetahu. Më 25 shtator 2020 Marjus Lulaj komunikon me Klaus Matishi të cilit i shkruan “…e çova Blerin të flasi me Enkeledën i rreshtova arsyet i thashë ne e dimë që je burrneshë prandaj po vim të themi tërhiqu jepja votën Fates dhe Landi është pa diskutim i thash ka një makinë dhuratë ça t’i dojë zemra asaj..” Teksa ka thënë “kam respekt për çunat”, Kapedani nuk pranon të tërhiqej nga gara, pasi e konsideronte të rëndësishme karrierën në sistemin e drejtësisë. Më 30 shtator 2020, Suel Çela i shkruan Klausit: “I ka ngel qejfi Fates (Pajtime Fetahut) me ne. Po kjo është absurde ded, unë u bana copash i thashë ti ble makinë 40 mi Enkeledës vetëm për t’u tëhek nga gara. Ça ka prit më shumë, ça kemi ndor ne atë se dun kolegët e vet… do kishim ba gabim të madh po t’ishte realizuar. Të tërhiqesh Enkelejda sepse nuk do ja jepshin votën kësaj se nuk e dun Faten shikoje votimin sot ka lan nam vetëm votën e vetes vet ka pas asnji votë tjetër… justifikimi ka ndiku pak po ta kuptosh se dun më atë mo ded… ne ja kërkuam Enkeledës tha kam shumë respekt për çunat e vlerësoj, por unë kam karrierën time e kam fitoren e sigurt. Enkeleda kupton s’është si kjo… shikoje përgjigjen ca na ktheu… po ma mir do ishte mos ishim perzi hiç… po normal qe ka lobu land edhe ka ba mire se po t’ja jepte Romi fitonte ajo shur*a… se ca i duheshi votë kësaj torrollinges…”, thuhet në një nga komunikimet e Suel Çelës me Klaus Matishin. Ai i tregon se Enkeleda Kapedani është zgjedhur në krye të Gjykatës së Elbasanit me 4 vota, ndërsa Pajtime Fetahu ka marrë vetëm votën e saj.