Burime mediatike në Jemen, të cituara edhe nga shtypi izraelit, pretendojnë se kryeministri Huthi, Ahmed al-Rahawi, është vrarë nga një sulm ajror i Forcave Mbrojtëse të Izraelit në kryeqytetin jemenas, Sanaa. Lajmi u përcoll së pari nga kanali Al-Jumhuriya me seli në Aden, i cili ka lidhje me kundërshtarët e rebelëve Huthi. Në raportimet e mediave izraelite nënvizohet se sulmi në Sanaa kishte për qëllim "eliminimin e udhëheqjes ushtarake dhe politike" të grupit Huthi. Al-Rahawi thuhet se ndodhej në një apartament në lagjen Bayt Baws në kohën e sulmit. Gazeta Aden al-Ghad që konfirmon lajmin, duke shtuar se kryeministri u vra së bashku me disa nga ndihmësit e tij. Rebelët Huthi kanë lëshuar raketa e dronë drejt Izraelit dhe kanë shënjestruar anije në Detin e Kuq për më shumë se 22 muaj. Ata thonë se sulmet kryhen në shenjë solidariteti me palestinezët, që po përballen me luftë në Rripin e Gazës që nga tetori i vitit 2023. Këto raketa dhe dronë të lëshuar nga rebelët zakonisht rrëzohen para se të arrijnë në Izrael. Megjithatë, një predhë e lëshuar nga Jemeni drejt shtetit hebre në 24 gusht shkaktoi shqetësim, për shkak se ishte e mbushur me municion thërrmues. Kjo ishte hera e parë që rebelët Huthi, lëshuan predha të tilla drejt Izraelit, që kur grupi militant filloi të gjuante raketa drejt Izraelit në vitin 2023. Përdorimi i municioneve thërrmuese e bën të vështirë që Izraeli t’i rrëzojë ato dhe po ashtu është tregues, sipas zyrtarit, se rebelët Huthi kanë siguruar teknologji shtesë nga Irani.