Ushtria izraelite ka ndërmend të zbatojë planin për pushtimin e plotë të Rafahut, qytetit në jug të rripit të Gazës ku thotë se strehohen tashmë shumë militantë të Hamasit. Përveç sulmeve me raketa përgjatë së shtunës, Izraeli shtoi thirrjet për evakuimin e civilëve palestinezë. Gazetarë, mjekë e dëshmitarë raportuan për AFP-në sulme në të gjithë territorin bregdetar, ku OKB thotë se ndihma humanitare është bllokuar pas kundërshtimit që forcat izraelite i bënë thirrjeve të vazhdueshme të ndërkombëtarëve. Dëshmitarët atje raportuan sulme intensive vecanërisht pranë vendkalimit kufitar me Egjiptin. E ndërsa Izraeli përparon me qëllimet e tij një raport i Departamentit Amerikan të Shtetit tregoi krisjen e marrëdhënieve mes Shteteve të Bashkuara dhe aleatit të vjetër hebre. Departamenti i Shtetit në raportin e paraqitur dy ditë më parë në Kongres vlerësonte se Izraeli mund të kishte shkelur të drejtën ndërkombëtare duke përdorur armë amerikane gjatë ofensivës në Gaza, por nuk gjeti prova të mjaftueshme për të bllokuar dërgesat. Pak ditë më parë edhe Presidenti Joe Biden kërcënoi publikisht se do të ndalonte disa bomba dhe predha artilerie nëse Izraeli vazhdonte sulmin e gjithanshëm në Rafah, aty ku Organizata e Kombeve të Bashkuara thotë se janë strehuar mbi 1.4 milionë njerëz. Pamjet: AFP