Izraeli duket nuk ka qëndruar indifferent ndaj thirrjeve të SHBA-së. Ambasadori i shtetit hebre në Uashington pohoi se një marrëveshje armëpushimi për t’i dhënë fund luftimeve mes Izraelit dhe Hezbollahut – grupit militant dhe partisë politike që kontrollon shumicën e jugut të Libanit – mund të arrihet “brenda ditësh”.Mike Herzog tha për radion e ushtrisë izraelite se ka ende disa pika për të cilat vazhdon diskutimi dhe duhen finalizuar, megjithatë “ne jemi afër një marrëveshjeje” dhe ajo mund të arrihet shumë shpejt, konfirmoi ai. Mes cështjeve që ende nuk janë zgjidhur është një kërkesë e Izraelit sipas të cilës ky i fundit insiston se rezervon të drejtën të veprojë nëse Hezbollahu shkel detyrimet që burojnë nga marrëveshja e re. Në parim, e gjithë ujdia duket se synon largimin e grupit militant si edhe trupave izraelite nga jugu i Libanit.Hezbollahu është shpallur organizatë terroriste nga Shtetet e Bashkuara, ndërsa Bashkimi Europian e ka vendosur në listën e zezë krahun e tij të armatosur, por jo edhe partinë e tij politike.Optimizmi rreth arritjes së një marrëveshjeje vjen pasi i dërguari i SHBA-së mbajti bisedime me palët javën e kaluar, me synim që të arrihet një marrëveshje.Hezbollahu nisi sulmet në kufi kundër Izraelit më 8 tetor 2023, vetëm një ditë pasi Hamasi ndërmori sulmin e tij të përgjakshëm ndaj shtetit hebre, që solli dhe shpagimin e ashpër izraelit në Gaza. Luftimet mes Hezbollahut dhe Izraelit u përshkallëzuan më pas shtatorin e këtij viti, me Izraelin që nisi sulme masive ajrore në Liban dhe më pas nisi një ofensivë tokësore në jug të Libanit.