Dikur i varur nga heroina, njeriu që Donald Trump ka emëruar në krye të të Departamentit të Shëndetësisë dhe Shërbimeve Njerëzore, sot bën thirrje që miliarda dollarë të taksapaguesve amerikanë të dërguara në Ukrainë, të ridrejtohen për financimin e qendrave të shërimit të amerikanëve që luftojnë me varësinë nga droga dhe alkooli. Robert F. Kennedy Jr insiston se sot ka një 'epidemi' jo vetëm të abuzimit me substancat narkotike, por edhe një plagë të madhe “vetmie, dëshpërimi, shkëputjeje e tjetërsimi”, teksa njerëzit në pushtet sipas tij, janë 'të varur nga lufta'. 69-vjeçari foli për mijëra viktimat nga fentanili dhe insistoi se është kohë të shpenzohet për “krizën brenda kufijve”. Agjencia që ai do të drejtojë ka një shtrirje të gjerë, që nga mbikëqyrja e ilaçeve, vaksinave dhe sigurisë ushqimore, e deri tek kërkimet shkencore në fushën e mjekësisë dhe programet e kujdesit shëndetësor. “Për një kohë të gjatë, amerikanët janë dëmtuar nga industria ushqimore dhe e prodhimit të ilaçeve, të cilat janë përfshirë në manipulime, keqinformime dhe dezinformime, kur bëhet fjalë për shëndetin publik”, tha Trump në një postim në rrjetin TruthSocial ndërsa njoftoi emërimin e Kennedy, për të cilin u shpreh se “do ta bëjë Amerikën përsëri të madhërishme dhe të shëndetshme!”. Kennedy, një ish demokrat që kandidoi si i pavarur në garën presidenciale të këtij viti, i dha fund fushatës së tij duke shprehur mbështetjen për republikanin Donald Trump me premtimin për të patur një rol në politikën shëndetësore të administratës së ardhshme republikane. Një skeptik hershëm ndaj vaksinave, Kennedy është një avokat që për dekada me radhë ka krijuar një bazë të gjerë mbështetësish që e admirojnë punën e tij për mjedisin, duke ngritur padi kundër kompanive të mëdha farmaceutike dhe të prodhimit të plehrave kimike që përdoren në bujqësi. Ai po ashtu ka bërë thirrje për rregulla më të rrepta lidhur me përbërësit e artikujve ushqimorë.