Monedha kombëtare e Iranit pësoi një tjetër zhvlerësim të fortë, duke mbërritur nivelin më të ulët kundrejt dollarit amerikan teksa autoritetet vendase po mobilizohen për të zbutur ndikimin e bllokadës detare të vendosur nga Shtetet e Bashkuara. Riali iranian ra në 1.81 milion për një dollar, përpara se të rimëkëmbej pak sërish. Sipas mediave iraniane, valuta ka humbur rreth 15% të vlerës së saj në ditët e fundit. Duket se konflikti dy mujor me SHBA e Izraelin po e trondit ekonominë e Republikës Islamike të dobësuar nga sanksionet. Sulmet ajrore që nisën më 28 shkurt, së bashku me bllokadën detare amerikane ndaj porteve dhe anijeve iraniane, kanë ndërprerë eksportet jetike të naftës, kanë penguar prodhimin vendas dhe kanë rritur inflacionin. Megjithëse Irani dhe SHBA arritën një armëpushim më 8 prill, Uashingtoni e shtoi presionin ekonomik duke vendosur bllokadë detare më 13 prill, duke e vështirësuar më tej për Teheranin forcimin e valutës përmes eksporteve. Inflacioni vjetor që ishte 40% para luftës, arriti në 50% deri më 4 prill. Çmimet e produkteve bazë, si orizi, vezët dhe pula, janë shtuar ndjeshëm që nga fillimi i konfliktit. Rritja e inflacionit shkaktoi protesta mbarëkombëtare në janar, një nga sfidat më të mëdha për qeverinë klerikale që nga Revolucioni Islamik i vitit 1979. Autoritetet përgjigjën egërsish, duke vrarë mijëra protestues, sipas organizatave për të drejtat e njeriut.