Me rastin e muajit të shenjtë të Ramazanit, Ambasada e Arabisë Saudite në Tiranë organizoi një iftar për besimtarët myslimanë. Ambasadori i Arabisë Saudite në vendin tonë, Faisal Ghazi Hifzi, përcolli mesazhin e vlerave që bashkojnë dy popujt tanë. “Shqipëria mike” e quajti diplomati saudit vendin tonë, teksa shprehu bindjen për thellimin e bashkëpunimit. “Kjo sofër që na ka mbledhur, pasqyron vlerat që bashkojnë popujt tanë, vlerat e tolerancës, bashkëjetesës dhe respektit të ndërsjellë, si dhe mishëron thellësinë e marrëdhënieve të shkëlqyera mes Arabisë Saudite dhe Republikës mike të Shqipërisë. I lutem Zotit të plotfuqishëm që të përjetësojë sigurinë, stabilitetin dhe prosperitetin. Dëshiroj të shpreh falënderimet e mia më të sinqerta dhe vlerësimin maksimal ndaj lidershipit dhe popullit mik të Shqipërisë, për bashkëpunimin dhe respektin e ndërsjellë, që ka karakterizuar marrëdhëniet tona bilaterale. Presim me padurim që partneriteti ynë të zhvillohet edhe më tej në të gjitha fushat me interes të përbashkët. Ju uroj nga zemra, agjërim të lehtë, të mbarë e të pranuar”. Tryeza që bashkoi besimtarët myslimanë në iftarin e 23 shkurtit kishte dhe një simbolik të veçantë për përfaqësuesit e ambasadës së Arabisë Saudite në vendin tonë, si dhe për të gjithë qytetarët sauditë, të cilët festonin njëkohësisht edhe ditën e themelimit të shtetit të tyre.