Mustafe Lici, babai i Ibrahim Licit, të akuzuar si autor hedh poshtë akuzat se djali i tij ka vrarë 32-vjeçarin, Ibrahim Mustafa, që u gjet dje në zonën e Livadhit, në Shkodër. Policia ka arrestuar dhe 15-vjeçarin me iniciale E. M., pasi dyshohet se në bashkëpunim me Ibrahim Liçin kanë vrarë me armë zjarri Mustafën. Por, sipas babait të Ibrahim Licit, i mituri ka gënjyer në polici, kur ka thënë se autori është djali i tij. Mustafe Lici thotë se adoleshenti është punëtor i Bajrave. “U shpall në kërkim Ibrahim Lici, për vrasjen e një komshiu tonë. Bashkëpunëtori i kriminelit, është një fëmijë i mitur, me grupin e Esmer Bajrit. Punon pastrues i baglave të kuajve të Esmer Bilalit. I mituri ka thënë sikur ka kryer bashkëpunim me Ibrahim Licin. Familja jonë është shumë e mbrojtur, jemi me kamera kudo që hamë, kudo që pimë, kudo që rrimë. Ky është një bllof i përgatitur nga policia, që mendojnë se do ta realizojnë duke gënjyer një fëmijë, duke i thënë se do të ketë mbrojtjen tonë. Por, është bllofi i radhës. Drejtori i policisë, në datën 17 të muajit të kaluar, e ka hequr personin nga kërkimi, sepse kishte dy vite që e mbante në kërkim policor. Ky është i njëjti krim, si ai në Livade, i familjes Frraca. Fati jonë dhe mbrojtja jonë janë vetëm kamerat, ky bllof është vetëm mediatik. Familja e tyre e di shumë mirë se kush ia ka vrarë djalin dhe kush ia ka nxjerrë nga shtëpia me dy telefonata. Krimi është justifikuar në atë mënyrë, sa jetojmë në epokën e horrave. Ne kemi armët tona shumë të fuqishme para policisë, kemi vendqëndrimin, ku pimë kafe, se kështu na ka detyruar jeta”.