Një ngjarje e rëndë ka ndodhur në Korçë mesditën e sotme, ku një 30-vjeçar është dhunuar me shkopinj bejsbolli nga disa persona. Policia bën me dije se ngjarja ka ndodhur në lagjen nr. 16, Korçë, në ambientin e një lavazhi. I dhunuari ndodhet në spital jashtë rrezikut për jetën. Autorët e kësaj ngjarjeje, shtetasit me iniciale S. S., K. S., M. Xh., dhe E. G., janë ende në kërkim, pasi u larguan menjëherë pasi goditën të riun. Në pamjet e siguruara nga Top Channel, shihet se si katër persona vrapojnë pas 30-vjeçarit, ndërsa në duar mbajnë shkopinj bejsbolli. Më pas për ti shpëtuar këtij sherri 30-vjeçari është futur në një servis, por sërish është kapur nga katër autorët, të cilët e kanë goditur shumë herë. Më pas atajanë larguar nga vendi i ngjarjes, ndërsa 30-vjeçari mbetet i shtrirë në tokë. Askush nuk ka ndërhyrë në momentin e sherrit dhe pas saj. Nga hetimet e kryera dyshohet se ky konflikt ka ndodhur pas një konflikti të mëparshëm të ndodhur më datë 14 shkurt të këtij viti, në Korçë, midis shtetasit me iniciale S. S., i shpallur në kërkim dhe të dhunuarit së bashku me të vëllain.