Shërbimi Sekret thotë se mundësia që pati një person i vetëm i armatosur që të qëllojë tetë herë drejt ish-Presidentit Donald Trump gjatë aktivitetit elektoral në Pensilvani ishte pjesërisht rezultat i dështimeve të shumta nga agjentët që u ishte ngarkuar detyra e mbrojtjes së ish-presidentit. Raporti për hetimin e brendshëm të kësaj agjencie për atentatin ndaj ish-presidentit, tashmë edhe kandidat republikan për president, identifikoi probleme me komunikimin dhe koordinimin, përpara tubimit të 13 korrikut në qytetin Butler, si dhe mbështetjen e tepruar tek agjencitë partnere të zbatimit të ligjit në nivel shtetëror dhe lokal. “Nuk mund të heqim dorë nga përgjegjësitë, apo t’ua kalojmë ato të tjerëve”, u tha gazetarëve të premten në Uashington drejtori në detyrë i Shërbimit Sekret, Ronald Rowe.