Forcat e Armatosura Greke, pas bashkëpunimit dhe koordinimit të Ministrive të Punëve të Jashtme dhe Mbrojtjes Kombëtare me autoritetet kompetente jordaneze, kanë kryer gjatë ditës së shtunë hedhjen në zona të veçanta të ndihmës humanitare prej 8.5 ton ushqimesh - në Rripin e Gazës , një zonë e shkatërruar dhe në prag të urisë. Dy video të shkurtra dhe fotografi të publikuara nga mediat greke tregojnë se si operacioni u përfundua me pjesëmarrjen e dy avionëve transportues (C-130H dhe C-27J) të Forcave Ajrore Helene me personelin e tyre përkatës, si dhe personelin nga Komanda e Luftës Speciale. Paketat e ndihmës, që përmbanin kryesisht ushqim, u hodhën mbi disa zona të caktuara të shkatërruara nga lufta, pasi është siguruar leja e posaçme. Sapo kanë përfunduar misionin aeroplanët grekë u kthyen në bazën e tyre në Elefsina. Planifikimi i operacionit , i koordinuar me autoritetet jordaneze dhe izraelite, filloi në fillim të javës së kaluar, por vendimi për pjesëmarrjen e Greqisë u mor në fund të muajit të kaluar. Procesi u parapri nga bisedimet midis Athinës dhe Jerusalemit, ndërsa disa orë para fillimit të operacionit, Kryeministri grek Kyriakos Mitsotakis kontaktoi presidentin e Autoritetit Palestinez, Mahmoud Abbas, duke shprehur qëndrimin e vendosur të Athinës për një zgjidhje me dy shtete dhe duke diskutuar zhvillimet e fundit në Gaza dhe Bregun Perëndimor. Ai gjithashtu përsëriti mbështetjen e Greqisë për Autoritetin Palestinez, si përfaqësuesi i vetëm legjitim i popullit palestinez, si dhe gatishmërinë e Greqisë për të ndërmarrë nisma të mëtejshme humanitare. “Greqia do të vazhdojë të ndërmarrë iniciativa për ndërprerjen e menjëhershme të konfliktit të armatosur , lirimin e pengjeve dhe rrjedhën e papenguar të ndihmës humanitare në Gaza. Është detyrë e të gjithëve ne të ndalojmë menjëherë vuajtjet njerëzore” – ka deklaruar me një postim në rrjetin Facebook kryeministri grek Kyriakos Mitsotakis. Edhe gjatë së shtunës si çdo ditë, mijëra palestinezë janë mbledhur pranë pikave të shpërndarjes së ushqimit në Gaza, përfshirë edhe ato të menaxhuara nga Fondacioni Humanitar i Gazës i mbështetur nga SHBA dhe Izraeli.