Një tubim i thirrur nga shqiptarët në rrhetet sociale nuk ka marrë autorizimin e policisë së Athinës. Policia greke, sic mëson Top Channel ka njoftuar se ka dhënë urdhër për ndalimin e grumbullimit të shtetasve shqiptarë në zonën Alimo të Athinës i parashikuar për më 15 dhjetor. Burime policore i thanë Top Channel se prej ditësh përflitej në rrjetet sociale për një takim të shtetasve shqiptarë ku dyshohet se do të hidheshin parulla patriotike shqiptare, do të përdoreshin flamuj shqiptarë dhe me gjasa do të kishte thirrje anti greke. “Këto veprime nuk kanë një arsye formale si në rastin e festës kombëtare së pavarësisë në 28 nëntor, ndaj vlerësohet se do të nxisin edhe reagimet negative të qytetarëve vendas, sidomos të ekstremistëve, ndaj janë marrë masat që jo vetëm të ndalohet ky grumbullim, por edhe të procedohen rreptë edhe pjesëmarrësit në të”, thuhet në një reagim të policisë greke Në datën 28 nëntor mijëra shtetas shqiptarë që jetojnë në Greqi festuan Ditën e Pavarësisë me këngë, valle dhe flamuj shqiptarë në sheshin “Sindagma” të Athinës. Festimet edhe pse ishin spontane, nuk u penguan nga policia greke, ndërsa në përgjithësi mediat greke komentuan pozitivisht këto festime.