Besimtarë grekë kanë marrë pjesë në festimet e Ditës së Epifanisë, një nga festat më të rëndësishme të fesë ortodokse greke. Sipas ritualit shumë prej tyre zhyten në det për të kapur kryqin që hedh mitropoliti apo prifti që bekon ujërat. Ky ritual kryhet në të gjithë vendin dhe përkujton pagëzimin e Jezusit në lumin Jordan. Në Pire të Athinës, në kremtimin e kësaj feste dhe në ceremoninë e bekimit të ujërave ka marrë pjesë vetë kryepeshkopi i Greqisë Ieronimos që ka hedhur kryqin në det pas Liturgjisë Hyjnore në Kishën e Trinisë së Shenjtë. Personi që është hedhur në ujërat e akullta bashkë me dhjetëra të tjerë dhe ka gjetur kryqin ishte një komando detare në pension. Pavarësisht temperaturave të ulëta ceremoni të tilla të “Bekimit të Ujërave” janë zhvilluar në të gjitha qytetet e tjera të vendit apo edhe në ishujt e Greqisë, në të cilat marrin pjesë përvec autoriteteve lokale edhe politikanët e vendit. Kryqi i bekuar nga prifti para ceremonisë i hedhur në ujërat e deteve, liqeneve apo lumenjve, besohet se do të sjellë fat të mirë për vitin në vijim për ata që e gjejnë atë në ujë. Madje notarët besojnë se personi që merr kryqin e shenjtë prej druri do të çlirohet nga shpirtrat e këqij dhe do të jetë i shëndetshëm gjatë gjithë vitit. Moti i mirë me diell ndihmoi të merrni pjesë në këto kremtime miliona grekë. Epifania, ose “Bekimi i Ujërave”, mbahet çdo vit më 6 janar dhe është një festë publike në të gjithë Greqinë që shënon edhe fundin e festave të Krishtlindjes.