Drejtësia vonon, por nuk harron: Prokuroria e Bosnjë dhe Hercegovinës njoftoi ngritjen e një aktakuze ndaj pesë krerëve të lartë të ushtrisë së Republikës Sërpska, nën dyshimin se në vitin 1992, kanë kryer krime lufte në një fshat në afërsi të qytetit veriperëndimor të Bosnjës. Aktpadira nënvizon se komandantët në fjalë, Veljko Brajic, Sllobodan Taranjeq, Ranko Kaurin, Branko Xhenopoljeq dhe Drashko Topic, morën pjesë në sulmin e armatosur të artilerisë dhe këmbësorisë në fshatin e pambrojtur Brishevë, si dhe në qytezat përreth Prijedorit, i cili banohej kryesisht nga popullatë civile e kombësisë kroate. “në atë kohë, brenda harkut kohor të vetëm pak orëve u vranë 61 persona, më i riu nga viktimat vetëm 16 vjec. Tre vetë u zhdukën, eshtrat e tyre ende sot e kësaj dite nuk janë gjetur”, thuhet në njoftim. Në aktakuzë flitet po kështu për dhunë seksuale ndërsa dhjetëra vetë, kryesisht burra, u dërguan në kampet e Prijedorit. Disa prej tyre humbën jetën gjatë transportit. Trupat e një numri të madh viktimash u gjetën, u zhvarrosën dhe u identifikuan gjatë viteve 1997, 1998 dhe 2001. Prokuroria e Bosnjë e Hercegovinës thotë se do t’i vërtetojë akuzat duke thirrur 143 dëshmitarë, nga të cilët pesë dëshmitarë do të dëshmojnë nën masat e caktuara mbrojtëse, dy ekspertë, si dhe me dorëzimin e më shumë se 300 provave materiale. Në Prijedor dhe qytetet përreth u vranë rreth 3200 persona, ndërsa 30,000 vetë të kombësisë joserbe kaluan nëpër kampet Trnopolje, Omarska dhe Keraterm.