Gjermania ka sekuestruar superjahtin më të madh në botë, i cili rezulton në emër të motrës së oligarkut të sanksionuar rus Alisher Usmanov. Policia federale gjermane tha të enjten se kishte sekuestruar Dilbarin me vlerë 600 milionë dollarë, pas disa javësh punë hetimore që ekspozoi pronësinë e vërtetë të jahtit, pavarësisht një lëmshi të vërtetë dokumentash që tentonon të fshihnin pronarin. Jahti është i regjistruar në Maltë - një vend mjaft i preferuar nga super të pasurit për të fshehur pasurinë e tyre. Autoritetet gjermane thanë se kishin përcaktuar se jahti ishte në pronësi të motrës së Usmanov, Gulbakhor Ismailova. Usmanov, një manjat i telekomunikacionit që zotëron rezidencën 48 milionë paundëshë Beechwood House në Highgate, Londër dhe shumë pasuri të tjera, u sanksionua nga MB muajin e kaluar. Miliarderi, i cili ka pasur interesa të mëdha në klubet angleze të futbollit Arsenal dhe Everton, tashmë ishte sanksionuar edhe nga BE dhe SHBA. Ismailova dhe një tjetër nga motrat e Usmanov, Saodat Narzieva, i janë nënshtruar gjithashtu sanksioneve të Mbretërisë së Bashkuar dhe BE-së. Qeveria e Mbretërisë së Bashkuar tha se Usmanov "transferoi në mënyrë indirekte asete te Ismailova, duke përfshirë edhe atë për lënien e motrës së tij si pronarja e vetme përfituese e jahtit Dilbar".