Ka dalë në një përfundim tronditës studimi më i fundit i Institutit prestigjoz Robert Koch (RKI), në bashkëpunim me Universitetin e Washingtonit dhe institucione të tjera kërkimore. Hulumtimi tregon se infeksionet rezistente ndaj antibiotikëve mbeten një kërcënim madhor i shëndetit në Gjermani duke kontribuar për dhjetëra mijëra vdekje çdo vit. Analiza, që u publikua në revistën Journal of Antimicrobial Chemotherapy – Antimicrobial Resistance, zbuloi se vdekjet e gati 45.700 persona në 2019-tën në vend kanë lidhje me me patogjenët rezistentë ndaj antibiotikëve. Në disa raste, rezistenca nuk ishte shkaku i menjëhershëm i vdekjeve, por infeksionet e gjakut, të rrugëve të frymëmarrjes dhe infeksionet abdominale ishin veçmas të zakonshme si pasojë fatale. Studimi vlerësoi se afër 9.600 nga këto vdekje mund t’iu atribuoheshin drejtpërdrejt rezistencës – që nënkupton se pacientët mund të kishin mbijetuar nëse bakteret nuk do të kishin qenë rezistente. RKI, që është instituti kryesor epidemiologjik i Gjermanisë, tha se rezistenca ndaj antibiotikëve është “një nga sfidat më të mëdha shëndetësore globale të kohës sonë”, që nxitet nga përdorimi i gjerë dhe keqpërdorimi i antibiotikëve. Përdorimi i tepruar, trajtimet e gjata apo përshkrimet jo të duhura të mjekëve krijojnë presion që mundësojnë që rezistenca ndaj antibiotikëve të përhapet.