Mos raportimi dhe mos asgjësimi i 1000 bimëve narkotike në zonën e Dukagjinit ka çuar në pezullimin nga detyra të 6 efektiveve të policisë në Shkodër. Agjencia e Mbikëqyrjes Policore për rajonin Shkodër-Lezhë, në bashkëpunim me Prokurorinë pranë Gjykatës së Shkallës së Parë Shkodër, ka ekzekutuar masat e sigurimit personal ndaj 6 efektivëve të policisë. Ata akuzohen për shpërdorim detyre, një vepër penale e kryer në bashkëpunim. Policët janë pezulluar nga detyra dhe u është ndaluar dalja jashtë shtetit, ndërsa ndaj tyre ka dyshime se nuk kanë kryer detyrën e tyre gjatë një operacioni anti-kanabis në Njësinë Administrative Shalë, Bashkia Shkodër, në korrik të këtij viti. Sipas hetimeve, gjatë kontrollit të territorit, efektivët kanë konstatuar rreth 1000 bimë narkotike, të cilat ndodheshin në proces tharjeje, por nuk i kanë raportuar dhe asgjësuar, siç e kërkon ligji. Të pezulluarit janë: • Nënkomisar Ardian Baçina • Nënkomisar Gjergj Mala • Inspektor Sokol Kroni • Inspektor Zef Doçi • Inspektor Kristjan Lokthi • Inspektor Faik Latifi Agjencia e Mbikëqyrjes Policore dhe Prokuroria po vijojnë hetimet për të zbardhur tërësisht rrethanat dhe përgjegjësitë e të dyshuarve.