Në spitalin Infektiv në QSUT, në Tiranë janë të shtruar 9 pacientë me moshë mbi 70 vjeç të prekur nga virusi i Nilit Perëndimor. Ethet e Nilit u rikthyen në vendin tonë pas 13 vjetësh duke shkaktuar deri tani 3 te vdekur dhe 17 te infektuar. Ministria e Shëndetësisë ka reaguar duke u bërë thirrje qytetarëve të qëndrojnë të qetë, por vigjilentë. Silva Bino, Shefe e Sherbimit të Epidemiologjisë dhe Sëmundjeve Infektive në ISHP ka dhënë një mesazh “Vetëm 1% e personave që shfaqin shenja klinike mund të bëjnë forma të rënda të sëmundjes. Është sëmundje që mund të parandalohet nëpërmjet parandalimit të pickimit të mushkonjave dhe natyrisht procesi e dezinsektimit që ul shpeshtësinë e kësaj sëmundje. Megjithatë ky proces nuk mund ti zhduki të gjithë mushkonjat, prandaj është e nevojshme që edhe vetë çdo individ të marri masa paraprake. Më e rëndësishme që çdo individ apo çdo biznes duhet të pastrojë mbeturinat apo plehrat, të cilat janë përthithës të këtyre mushkonjave”. Në lidhje me situatën ka folur edhe mjeku epidemiolog, zoti Ilir Alimehmeti. “Lidhur me raportimin e bërë publik një ditë më parë nga ISHP-ja, humbjet e jetës përbejnë 0,1 përqind të rasteve. Kjo do të thotë që 80% e rasteve përgjithësisht kalojnë pa asnjë lloj simptome, pra nga 1000 vetë, 800 nuk do të kishin simptoma fare. 20% e rasteve, pra 200 vetë ndër 1000 do të kishin simptoma të lehta si dhimbje trupi, dhimbje gryke, dhimbje koke, ndoshta edhe njëfarë temperature. Dhe vetëm 1% e rasteve, pra 10 ndër 1000 mund të kenë infeksione të sistemit qëndror nervor. Nuk duhet krijuar panik I madh , pasi duke parë që kemi 17 të infektuar dhe 3 humbje jete, kjo të shtyn që vdekshmëria është shumë më e lartë, por në të vërtetë, është afro 0,1% dhe shumica dërrmuese nuk ka asnjë lloj simptome”.