Në kuadrin e diskutimeve për politikën e migracionit, grupi parlamentar i partive CDU/CSU ka formuluar dy mocione për Bundestagun, në të cilat sqarohen edhe idetë përkatëse për këtë temë. Aleanca politike e qendrës së djathtë kërkon një ndalim de facto të hyrjes në Gjermani për të gjithë personat që nuk kanë dokumente të vlefshme për të hyrë në Gjermani dhe që gëzojnë lirinë e lëvizjes që ekziston brenda BE, pavarësisht nëse ata bëjnë kërkesë për azil. Ndër pesë pikat që sipas CDU/CSU duhet të zbatohen menjëherë, bën pjesë edhe “arrestimi i menjëhershëm dhe mbajtja në paraburgim” e personave të cilët janë të detyruar të largohen nga Gjermania. Për këtë duhet të rriten në mënyrë të konsiderueshme kapacitetet përkatëse të burgjeve në landet gjermane. Përveç tyre qeveria federale duhet të vërë sa më shpejt që të jetë e mundur në dispozicion të gjitha objektet që ka në zotërim. Partitë CDU/CSU kërkojnë gjithashtu që landeve gjermane t’u jepet më shumë mbështetje për dëbimin e personave që janë të detyruar për t’u larguar nga Gjermania. Theksohet se dëbimet duhet të kryhen çdo ditë.