Më 4 shtator u ekzekutua në Shkodër Kristian Kola. Pamjet nga momenti i vrasjes së 34-vjeçarit janë publikuar të enjten në emisionin “Top Story” në Top Channel. Videoja tregon dy persona që afrohen me motor pranë një hoteli në Shkodër dhe qëllojnë në drejtim të Kolës. Njëri prej tyre kthehet për një moment, si për t’u siguruar që viktima kishte ndërruar jetë, dhe më pas të dy largohen me shpejtësi. Gjatë ngjarjes, dy gra që ndodheshin aty pranë duken të tronditura, ndërsa në zonë kishte edhe një autobus me turistë që sapo kishte ndaluar. Policia, e cila ende nuk ka mundur të zbardhë ngjarjen, dyshon se pas vrasjes mund të fshihet Ragip Gila, i njëjti person që akuzohet edhe për një tjetër krim të rëndë në Shkodër, ku pak ditë më parë mbetën të vrarë dy persona dhe u plagosën dy të tjerë. Megjithatë, burime pranë hetimit thonë se dy rastet nuk kanë të njëjtin motiv dhe po hetohen veçmas.