Procesi i anëtarësimit të Shqipërisë drejt Bashkimit Evropian do vijojë me ritme të shpejta dhe hapja e grupkapitullit të dytë të negociatave, pak ditë më parë, nuk do të jetë i vetmi për këtë vit. Deklarata u bë nga Komisionerja e Bashkimit Evropian për Zgjerim, Marta Kos, në forumin me temë “BE takon Ballkanin”, që po mbahet në Sofje të Bullgarisë. “Po punojmë për përshpejtimin e negociatave sa më shumë që të jetë e mundur. Dhe tashmë po shohim përparim që do të kishte qenë i paimagjinueshëm vetëm pak vite më parë. Vetëm në fillim të kësaj jave kemi hapur një grup tjetër negociatash me Shqipërinë, të dytin që kur mora detyrën 5 muaj më parë, dhe me shumë mundësi jo të fundit këtë vit”, tha Marta Kos. Komisionerja Marta Kos e cilësoi procesin e zgjerimit si historik, ndërsa ritheksoi edhe njëherë se do të jetë avokatja e vendeve kandidate për anëtarësim në Bashkimin Evropian, nëse zbatojnë reformat. Për zyrtaren më të lartë të zgjerimit në union, si vendet kandidate, ashtu edhe Bashkimi Evropian, do të përfitojnë nga ky moment historik dhe do ta përfundojnë bashkimin e kontinentit. “Periudha e lodhjes nga zgjerimi ka mbaruar. Brezi aktual i liderëve evropianë e kupton se bashkimi i kontinentit është çelësi për garantimin e paqes, lirisë, sigurisë dhe prosperitetit për të gjithë evropianët”, shtoi komisionerja Kos. Komisionerja për Zgjerim deklaroi se bashkimi i Evropës është një mënyrë për të konsoliduar stabilitetin dhe se zgjerimi është mjeti më i rëndësishëm strategjik i Bashkimit Evropian.