Dy të vrarë dhe dy të plagosur, ky është bilanci I konflikti që degradoi në përdorim të armës së zjarrit në Maqedoninë e Veriut. Krimi ndodhi rreth orës 14:30 në fshatin Çellopek të Tetovës, ndërsa viktimat dhe autori kishin lidhje familjare. Sipas mediave fqinje, vrasësi, një 60-vjeçar, që u prangos pak minuta pas ngjarjes, ekzekutoi me armë dy familjarë të tij dhe plagosi një tjetër. Shkak për vrasjen dyshohet se u bë një konflikt për vendin e parkimit. Nga të shtënat, mori plagë në trup edhe vetë autori. Në vendngjarje shkoi menjëherë një grup hetimor që mblodhi provat dhe dëshmitë e para dhe po punon për të zbardhur dinamikën e plotë të ngjarjes. Ndërkohë forca të shumta policie kanë rrethuar zonën pasi situata vijon të jetë e tensionuar. Dyshohet se autori dhe viktimat mund të kenë pasur mosmarrëveshje të mëparshme, që mund të kenë çuar më pas në përshkallëzimin e konfliktit dhe përdorimin e armës së zjarrit.