Departamenti Amerikan i Shtetit ka shpallur ‘non grata’ dy zyrtarë shqiptarë të Maqedonisë së Veriut. Sipas njoftimit ata janë Artan Grubi, ish-zëvendëskryeministri i Maqedonisë së Veriut dhe Enver Bexheti, gjyqtar në Gjykatën e Apelit të Maqedonisë së Veriut. Të dy këta persona sipas departamentit amerikan janë të përfshirë në korrupsion duke pranuar ryshfet për të minuar proceset gjyqësore. “Në bazë të Seksionit 7031(c), Departamenti i Shtetit ka përcaktuar publikisht Artan Grubin dhe Enver Bexhetin për përfshirjen e tyre në korrupsion të rëndësishëm duke pranuar ryshfete për të minuar proceset gjyqësore të lidhura me dënimin penal të Sasho Mijalkov, drejtor i Kundërzbulimit të Maqedonisë së Veriut”, thuhet ndër të tjera në njoftimin e DASH. Më 21 nëntor ambasadorja amerikane në Shkup paralajmëroi se Uashingtoni do të zgjeronte listën e personave “non grata” në Maqedoninë e Veriut. Departamenti i Shtetit sanksionoi edhe anëtarët e ngushtë të familjeve të dy zyrtarëve: Grubi e Bexheti. Ish-zv.kryeministri Artan Grubi reagoi të hënën në mbrëmje duke thënë se është informuar nga media për shpalljen “non grata”. “Jetën time publike ia kam kushtuar mbrojtjes së vlerave demokratike perëndimore. Ky vendim më prek drejtpërdrejt dhe personalisht, ndaj do të angazhohem me gjithë përkushtimin për të zbardhur plotësisht këtë çështje”, thuhej në reagimin e Grubit.