Një ngjarje tronditëse është zbuluar ditën e sotme në Shënavlash të Durrësit, ku policia gjeti të hedhur në pus një 62-vjeccar të vrarë me armë zjarri. Pas tre javësh hetime intensive, policia e Durrësit ka zbardhur krimin e rëndë brenda familjes dhe ka arrestuar autorin e dyshuar, djalin e viktimës. Ngjarja filloi kur Esmerald Balla, 30 vjeç, më 15 gusht denoncoi në komisariatin e policisë se babai i tij, Enveri, kishte humbur kontaktet dhe dyshohej se ishte vrarë nga një grua e panjohur me të cilën ishte larguar nga shtëpia, pas marrjes së parave të familjes. Hetimet e kryera nga Sektori për Hetimin e Krimeve të Rënda dhe të Krimeve Kibernetike, në bashkëpunim me Prokurorinë, zbuluan se 30-vjeçari Esmerald Balla kishte kryer krimin. Pas një konflikti për një shumë të madhe parash, ai kishte vrarë me pistoletë babanë e tij, në Stan ku mbanin bagëtitë, dhe më pas kishte fshehur trupin në një pus, rreth 1 km larg vendit të krimit, ndërsa armën e kishte hedhur në kanal. Të afërmit tregojnë se janë befasuar nga ngjarja, por dhe dyshonin që pas zhdukjes së 62-vjeçarit qê këtë verë kishte vendosur të investonte në fermën ku punonte me të birin. Enver Balla, babai i katër fëmijëve, jetonte në të njëjtën shtëpi me familjen e djalit që akuzohet për vrasjen e tij, si dhe me gruan e tij të dytë, pas vdekjes së nënës së fëmijëve të tij. Policia ka gjetur armën e krimit dhe ka sekuestruar prova të tjera që lidhin të dyshuarin me ngjarjen. Trupi i viktimës është dërguar në morgun e spitalit të Durrësit për ekzaminim mjeko-ligjor. Ndaj 30-vjeçarit rëndojnë akuzat e "Vrasjes për shkak të marrëdhënieve familjare", "Mbajtjes pa leje dhe prodhimit të armëve" dhe "Fshehjes dhe asgjësimit të kufomës". Hetimet vijojnë për zbardhjen e plotë të ngjarjes për të cilën dyshohet të ketë dhe bashkëpunëtorë të tjerë brenda familjes.