Ngjarja tragjike në Durrës, ku një 15-vjeçar humbi jetën pas një sherri mes adoleshentësh, ndodh në një vit ku janë regjistruar edhe raste të tjera dhune me pasoja fatale për jetën, duke e bërë edhe më të dukshme rritjen alarmante të agresivitetit tek të rinjtë. Për ekspertët, rastet janë një sinjal shqetësues që nuk lidhet me incidente të veçuara, por me një realitet të ri social, ku dhuna po bëhet gjithnjë e më e pranishme në jetën e adoleshentëve. Psikologia Armela Bejko thekson se shumë adoleshentë nuk kanë aftësitë emocionale për të menaxhuar zemërimin apo konfliktin, duke reaguar me impulsivitet në situata që dikur zgjidheshin me dialog. Ndaj duhet ndërhyrë. Në këtë klimë të tensionuar brenda botës së të miturve, specialistët kërkojnë që rastet të vlerësohen realisht dhe të shihen si një thirrje urgjente për të vepruar nga të gjithë aktorët përpara se dhuna mes adoleshentëve të kthehet në normalitet të frikshëm për shoqërinë.