Gjykata e Elbasanit dha dënimin për 4 adoleshentët të cilët vranë bashkëmoshatarin e tyre Fatjon Bici në Gramsh. Ergi Karaj u dënua me 12 vite burg për veprën penale të vrasjes, 10 vite burg për veprën penale plagosje, 10 vite burg për vrasje të mbetur në tentativë dhe 5.5 vite për armëmbajtje. Në total ai u dënua 27 vite burg dhe me gjykim të shkurtuar Gjykata vendosi përfundimisht 18 vite burg. Orgito Çarçiu u dënua për katër vepra penale 21 vite burg gjithësej dhe në gjykim të shkurtuar ai do të vuajë 14 vite burg. Xhonatan Çekrezi u dënua nga gjykata për 4 vepra penale me 12 vite burg, në gjykim të shkurtuar 8 vite. Ndërsa Stiven Murati u dënua nga gjykata me 10 vite burg dhe me gjykim të shkurtuar do të vuajë 6 vite e 8 muaj burg. Ngjarja e rëndë ndodhi në Gramsh në maj të vitit 2023 ku një grindje e nisur në rrjete sociale përfundoi me një konflikt me thika në rrugë. Teksa tentoi të shuante konfliktin mes 4 adoleshentëve dhe kushëririt të tij, 15 vjeçari Fatjon Bici mbeti I vrarë me thikë, menjëherë sapo doli nga shkolla.