Një çift në krahinën jugore indiane Kerala përdornin sot një texhere gjigante të marrë borxh për të “lundruar” drejt vendit të martesës së tyre. Krahina bregdetare është goditur nga reshje të shumta prej disa ditësh, ku deri tani kanë humbur jetën të paktën 25 njerëz. Shumë rezidentë janë izoluar në fshatrat e tyre prej të premtes, teksa dalja e lumenjve nga shtrati ka përmbysur rrugët. 11 trupa ishin gjetur në zonën Iduki dhe 14 në Kotaiam thanë zyrtarët për rrjetin AFP. Mijëra nejrëz janë evakuar dhe rreth 100 kampe janë ngritur për të mbijetuarit. Ushtria, forcat ajrore e detare po ndihmojnë në operacionet e shpëtimit, ndërsa shumë njerëz mbeten të humbur. "Kodra u shemb pranë nesh. Çdo gjë ka humbur, ka dëme të mëdha”, thoshte një banor i Kerala për mediat lokale.