Sekretari amerikan i Shtetit Antony Blinken zhvilloi këtë të enjte vizitën e tretë në Lindjen e Mesme që nga nisja e luftës mes Izraelit dhe Hamasit. Sekretari Blinken u takua me kryeministrin Benjamin Netanyahu dhe kabinetin e tij të luftës në Jeruzalem dhe më pas shkoi në Ramallah në Bregun Perëndimor për t’u takuar me presidentin e Autoritetit Palestinez Mahmoud Abbas. Sipas BBC, sekretari Blinken i tha Abbas se Shtetet e Bashkuara të Amerikës ishin të përkushtuara për të ndërmarrë "hapa të prekshme për të çuar përpara një shtet palestinez që jeton në paqe, liri dhe siguri së bashku me Izraelin”, Ndërsa në takimet me autoritetet më të larta në Izrael, Blinken bëri thirrje për një zgjatje të mëtejshme të paktën edhe me një ditë të armëpushimit mes Izraelit dhe Hamasit me qëllim siç tha që të “lirohen të gjithë pengjet. Sekretari Amerikan i shtetit tha s nga ana tjetër Izraeli duhet të garantojë sigurinë e civilëve palestinezë në Gazën jugore dhe plotësimin e nevojave të tyre humanitare, përpara se të rifillojë operacionet ushtarake. Blinken tha se Izraeli duhet të caktojë hapësira në Gazën jugore dhe qendrore ku civilët e pafajshëm mund të strehohen dhe të jenë të sigurt, dhe gjithashtu përmendi se çdo sulm ndaj infrastrukturës humanitere, siç janë spitalet duhet të shmanget. Pamjet: AFP