Presidenti i Shteteve të Bashkuara, Joe Biden, deklaroi se kryeministri i Izraelit, Benjamin Netanyahu, nuk është duke bërë mjaftueshëm për ta siguruar një marrëveshje për lirimin e pengjeve që po mbahen në Rripin e Gazës nga Hamasi. Biden theksoi gjithashtu se SHBA-ja është afër ta paraqesë një propozim përfundimtar para negociatorëve që po punojnë për arritjen e një marrëveshje për pengjet dhe për armëpushim në Gazë. Duke folur për gazetarë në Shtëpinë e Bardhë, një ditë pasi forcat izraelite tërhoqën trupat e gjashtë pengjeve të vrarë në një tunel në Gazë, Biden tha se pengjet u vranë së fundmi nga militantët e Hamasit. I pyetur nëse Netanyahu është duke bërë mjaftueshëm për arritje e një marrëveshjeje për pengjet, Biden tha: “Jo”, pa shpjeguar më shumë. Megjithatw, shtoi se është “shumë afër” t’ua paraqesë të dyjave palëve një marrëveshje përfundimtare për pengjet. “Shpresa vdes e fundit”, tha si kur u pyet nëse marrëveshja do të jetë e suksesshme. Kritikat e reja të Bidenit për Netanyahun vijnë në një kohë kur ai dhe Kamala Harris, e cila do të garojë në vend të tij në zgjedhjet e nëntor, përballen me thirrje të vazhdueshme për veprime vendimtare për t’i dhënë fund luftës gati 11-mujore në Gazë. Netanyahu, i cili e ka akuzuar Hamasin për pengimin e arritjes së një marrëveshjeje, tha se “kushdo që vret pengje nuk dëshiron marrëveshje”. Qytetarët izraelitë dolën në rrugë të hënën për ditën e dytë radhazi, dhe sindikata më e madhe e punëtorëve nisi një grevë të përgjithshme, për t’i bërë trysni Qeverisë ta arrijë një marrëveshje për kthimin e pengjeve. Negociatat, me ndërprerje të kohëpaskohshme, nën ndërmjetësimin e SHBA-së, Katarit dhe Egjiptit, kanë dështuar të prodhojnë marrëveshje për propozimin e shtruar nga Bideni në maj.