Nga poezia poshtë ballkonit, aktori Çun Lajçi pranoi ftesën e ish-kryeministrit Sali Berisha, i cili e mikpriti në shtëpinë e tij, i vetëdijshëm se po shkelte ligjin për të disatën herë. Lajçi publikoi sot foto nga takimi i 21 majit me Berishën që ndodhet në arrest shtëpie që nga dhjetori i viti të kaluar, ku bie në sy pritja e ngrohtë me pije, ushqim e padyshim biseda, të cilat i ka ndarë në “Facebook”. Aktori i jep kurajo ish-kryeministrit dhe rendit tri arsyet që e bindën t’i bashkohet aksionit opozitar poshtë ballkonit të tij. Mos u dorëzo Sali Tropoja, e nis ai shkrimin, duke e vlerësuar Berishën për lirinë e njeriut që e sakrifikoi nji jetë, për mirëqenjen e të tjerëve dhe të atdheut t'hequr n'vargojt e diktaturës. Aktori është një prej personazheve që mbështet pubkisht ish-kryeministrin dhe kundërshton lënien e tij në masën arrest shtëpie. Kjo është e disata herë që Berisha pret në shtëpi persona që nuk janë familjarë, duke kundërshtuar urdhrin e Gjykatës së Posaçme Antikorrupsion. Më parë Berisha u takua me gazetarin e Rait dhe ish-eurodeputetin gjerman të CDU-së.