Vendet europiane kanë dalë me një plan alternativ paqeje për fundin e luftës në Ukrainë, i cili ndryshon ndjeshëm nga propozimi i shumëdiskutuar i administratës së Donald Trump. The Telegraph shkruan se plani europian i paqes përputhet shumë më ngushtë me interesat e Ukrainës dhe nuk përfshin lëshimet ndaj Rusisë që shihen në versionin amerikan. Pikat më të forta të tij janë se plani europian nuk i kufizon përmasat e Forcave të Armatosura të Ukrainës, nuk e ndalon anëtarësimin e saj në NATO dhe e nënvizon qartë se Kievi nuk do të detyrohet të miratojë një status neutral. Ukraina gjithashtu do të jetë në gjendje, të ftojë "forca miqësore" në territorin e saj - duke përfshirë trupa nga Koalicioni i të Gatshmëve. Dokumenti europian parashikon gjithashtu një armëpushim të menjëhershëm dhe të pakushtëzuar, që do të monitorohet nga Shtetet e Bashkuara dhe vendet evropiane; garanci sigurie ligjërisht të detyrueshme për Ukrainën, përfshirë nga Shtetet e Bashkuara, të modeluara sipas Nenit 5 të NATO-s; asnjë lëshim territorial - çështjet kufitare do të diskutohen pas armëpushimit; Kthimi i kontrollit mbi Centralin Bërthamor të Zaporizhzhisë dhe digën Kakhovka në Kiev; restaurimin e plotë dhe kompensim për dëmet, duke përfshirë edhe përdorimin e aseteve të ngrira ruse; mundësinë e vendosjes automatike të sanksioneve ndaj Rusisë në rast të shkeljes së kushteve të paqes. Sipas planit amerikan ndërkohë , Kievi pritet të lëshojë zonat e Donbasit që aktualisht kontrollohen nga Ukraina, të zvogëlojë ushtrinë e tij dhe të heqë dorë nga një pjesë e konsiderueshme e armatimit të tij.