Një video nga vija e frontit në Ukrainën lindore që tregon dorëzimin e një grupi ushtarësh rusë në një incident që duket se përfundon me vdekjen e tyre, ka ngjallur reagimin e Moskës e cila nxitoi të akuzonte Ukrainën për ekzekutimin e të burgosurve rusë të luftës. Nëse akuza të tilla do të vërtetoheshin, atëherë ngjarja do të përbënte krim lufte. Kievi nuk ka bërë ende asnjë koment. BBC, që përcjell lajmin, thotë se nuk ka qenë në gjendje të vërtetojë pohimet e Rusisë nisur vetëm nga videoja në fjalë, por është duke i studiuar pamjet e shfaqura aty. Incidenti thuhet të ketë ndodhur në 12 nëntor ose pak përpara në Makiyivka, një fshat në vijën e frontit në rajonin e Luhanskut. Pamjet me dron u shfaqën më vonë atë ditë dhe të dielën, disa faqe pro-ukrainase nisën të tregonin trupat e një numri ushtarësh me uniformë të shtrirë në tokë në oborrin e një ferme. Një pjesë e pamjeve nga kjo skenë shfaqen edhe në një video të postuar në internet nga Ministria e Mbrojtjes e Ukrainës në lidhje me operacionet ushtarake në zonën e Makiyivka.