Emërimet e ministrave të rinj kanë bërë që disa prej drejtorive më të rëndësishme të mbeten pa titullarë. Por, qeveria nuk ka humbur kohë për të gjetur zëvendësuesit. Kështu në Portin e Durrësit, pas ikjes së Pirro Vëngut si ministër i mbrojtjes, në krye është emëruar Kreshnik Bajraktari. Ai ka mbajtur më parë postin e këshilltarit në ministrinë e Infrastrukturës dhe Energjisë. Konsiderohet person me përvojë të gjatë në fushën e transporteve dhe për disa vjet ka drejtuar qendrën e trafikut urban në Tiranë. I diplomuar në Universitetin Politeknik të Tiranës, Fakulteti i Inxhinierisë Mekanike, ku ka përfunduar edhe Masterin Shkencor në profilin e “Konstruksioneve Mekanike të Mjeteve Lëvizëse”. Ndërkohë lënia bosh e drejtimit të IKMT-së, pasi kreu i këtij institucioni Ervin Hoxha u bë ministër i brendshëm, ka bërë që ky institucion t’i besohet sërish Dallëndyshe Bicit. Në vendin e saj në krye të Kadastrës ka ardhur një figurë e re Lorena Goxhobelli. Goxhebelli vjen nga Ministria e Mbrojtjes, ku shërbente si këshilltare e jashtme ligjore për pronësinë në kabinetin e ministrit që prej qershorit 2022. Ajo ka një eksperiencë të gjatë në fushën e drejtësisë duke u fokusuar kryesisht në çështjet e pronësisë, administrimit të tokës, kontratave publiko-private për administrimin e pronës shtetërore. Sipas CV-së së saj të publikuar në faqen zyrtare të Ministrisë së Mbrojtjes, Lorena Goxhobelli është diplomuar në vitin 2006 në Universitetin e Tiranës dhe ka përfunduar studimet master në Ekonomik, me fokus Administratën Publike, në periudhën 2009 – 2011. Ndërkohë vendi i lënë bosh nga ministri i ri i financave te Agjencia kombëtare e burimeve natyrore, është zënë nga Erlind Sulo. Erlind Sulo ka mbajtur kreun e Koorporatës Elektro-Energjetike Shqiptare. Më parë ai ka qenë drejtoi i FRESH në Sarandë dhe më vonë është emëruar edhe drejtor i Parkut të Butrintit. Tashmë KESH është institucioni i vetëm që ka mbetur pa drejtues.